هل كانت طفولة سعيدة ..؟

مرحبا كلن باسمه ..

اليوم أنا بتكلم عن طفولتي .. كيفي بلوقي

طفولتي كانت سعيدة حيل رغم الجلد اللي كنت احصله من أمي فديتها الا اني كثر ماانجلدت كثر ماتدللت وتدلعت

أمي الله يحفظها كانت اذا تستلمني والله ماتهدني الا لما تشخط جسمي حتى الدم يظهر بعض الأحيان

بس والله اني دايماً أقول لولاها ولولا تشديخها فيني ماكنت بنجز ولا بسوي نص اللي سويته في حياتي

يمكن صغر سنها أحد الأسباب في اعتمادها هالأسلوب في تربيتي لنه بيني وبينها 18 سنة بس

وهي دايماً تقولي انا ربيتج وتربيت وياج لني كنت ياهل أصلاً ... تسامحيني بنتي؟

وأنا لزوم التغلي أقول لها لا مابسامحج الا بفلوس

وترد تكنسل ويهي بكم طراق وياليت اتعظ وماعيد الحركة البايخة لكن هيهات

الظاهر أدمنت طراقاتها

المهم

نرجع إلى ماكنا فيه من الحديث <=-- ركزوا على هالجملة لني بسألكم فيها سؤال بعد شوي ذكروني اذا نسيت

أنا كنت من المتفوقين في دراستي وماكنت اتنازل عن المركز الأول أبداً

أتذكر أول يوم لي في الروضة كأنه توه أمس لأن اللي صار لي فيه عمري مابنساه ههههـ

رحت الروضة مع أمي حالي حال باجي الأطفال

ماسكة ايد امي

اللي تخلت عني مجرد حطيت ريولي داخل الصف والله هدتني ومشت عني

بس انا ما صحت ولا صارخت ولا سويت شي عادي الوضع عندي

أذكر كنت اطالع اليهال اللي يصيح واللي يعافر واللي يطق المس وحالتهم حالة

وانا والله كنت اطالعهم بكل استنكار ولسان حالي يقول سلامات عسى ماشر شصاير؟

بعد مرور 10 دقايق تقريباً بدا مخي يفكر ويحلل ويستنتج

هم ليش يصيحون جذه؟

الظاهر انه هذا واجب من واجبات الروضة ولا بد اني اسوي مثلهم

فرحت عند المس وقمت ارفسها واصارخ واسوي نفسي اصيح حالي حال الجماعة

بعدها تعرفت على وحدة اسمها سارة

وكانت حزينة وكئيبة وتقول ابا اروح البيت

وانا النشمية فديت قلبي والله اني حنونة الله يحرسني

دقيت على صدري و قلت لها أنا لج والشر ماينالج

مسكتها من ايدها وطلعت وياها من الصف وبطلع من الروضة بوديها بيتهم

مسكوني الجماعة بره ها على وين ؟

قلت لهم لا بس بوديها بيتهم مسكينة تصيح

طبعاً جعموني ورجعوني الصف وكأني بهم يقولون وش عندها جمعية حقوق الإنسان

بعد يوم طويل في الروضة رجعت البيت

وياليتني مارجعت

أذكر كانوا عاطينا بعض الرسومات نلونها

وأول رسمة مسكتها كانت حرف A

أمي حدها obsessed of perfection

قامت نقلت لي الرسمة في مسودة عشان تخليني ألونها أول هناك ولما تتأكد اني ضابطة الشغلة تخليني اهبب في أوراق الروضة

وتقوم أختكم في الله وتمسك في القلم الأسود وتقعد تحفر في ذاك الدفتر يقالها تلون

والله وعيني ماتشوف الا النور ماوعيت ولا أمي تضرب راسي في الجدار ههههههـ

أعتقد انه طريقة أمي هي السبب في هوسي بالكمال اللي ساعدني في أمور وايدة رغم انه شي متعب ويهد الحيل

امممـ اعتقد هذا يكفي الحينه

لي عودة مع حكايات أخرى من طفولتي … وربما لا

تحياتي :*