My BB has been stolen... :(

انسرق البي بييييييي


قلبي يعورني واللهـ


واللي معور قلبي أكثر اني مااكتشفت الا اليوم وهو انسرق أمس ههههه


عالعموم الجماعة اللي عندي عطوني عالبي بي عطوني بلوك واقنور لين الله يفرجها واخذ لي واحد ثاني

أحبكمـ :*

فقرات متقاطعة..

هاااااي كيييفكوون.؟؟ انشاللهـ طيبون؟

اليوم البوست بيكون طويل شوي وفيه تفاصيل بزيادة فاللي مايحب التفاصيل لايقرا لووول

أمس علي سافر مثل ماكان مفترض وتكلمت وياه بالفون لآخر لحظة في المطار

كان يكلمني كأنها آخر مرة بيكلمني فيها

ويقولي الحين منو بيستهبل وبيستعبط علي؟؟

ماعندي أحد أهزأه هناك شسوي؟

قلت له عادي عنبوه كلها يومين ثلاثة وانت هني شفيك يبه

وعدني انه يكلمني أول مايوصل

هالكلام كان الساعة 3 العصر تقريباً وأنا كنت في الجامعة

خلصت كلاسات الساعة 6 ورجعت البيت صليت وعلى طول طلعت مشوار ويا أمي

رجعنا الساعة 9 ونص ورديت طلعت مرة ثانية الساعة 11 إلا ربع ورجعنا الساعة 1 بالليل وطول هالوقت من بعد مكالمتي ويا علي ماشفت التلفون

لما رجعت البيت وانسدحت في الفراش سرحت شوي

كنت أفكر في علي ماغيره كيف اليوم كان غريب لني ماسمعت صوته لأكثر من 10 ساعات وهذي سابقة بصراحة من تعرفت عليه وهو ناشب لي نشبة حليله ههههه

طلعت تلفوني بكلمه تصوروا لقيت منه 37 مسكول و11 مسج ..!!

اتصلت فيه على طول

أنا: ألووو علووه وينك؟

علي: تف عليج حمارة وحدة انتي ماتخافين الله؟

أنا: هههه ليش شفيك شصاير على فكرة قبل كل شي ترى وحشتني

علي: يالزفتة والله العظيم تعرفين من متى انا اتصل فيج جيكي تلفونج شوفي كم مرة متصل فيج وينج انتي ليش ماتردين ماشالله عندج عيال شاغلينج ولا شو سالفتج بالضبط <=—هذا كله في نفس واحد حسيته بيغمى عليه

أنا: انزين لاتزف انا آسفة بس والله انشغلت وعندي أسباب وجيهة بقولها لك لما ترجع

علي: لما أرجع عشان يمديج تألفين لي قصص وحكايات مثل ويهج أعرفج انا هههه

أنا: أخيراً ضحكت.. قلت لك انك وحشتني؟ على فكرة أخلاقك صايرة وايد زفتة مادري تماشي منو

علي: والله انا من ماشيتج وانا مخترب توني عرفت معنى كلمة أصدقاء السوء .. انتي وحشتيني أكثر حياتي

مداخلة جانبية : قالي حياتي شفتوا كيف

على فكرة ماحسيتوا اني نجيبب محفوظ يكتب مسرحية

أنا: لحظة شو حياتي لايكون ملجت علي وانا مادري.. علوووه تحبني انت ادري فيك تحبني .. مالومك الصراحة

علي: وع عليج شو خلصوا البنات عشان أحبج وع

أنا: أصلا تموووت فيني بعد

علي: ههههه فديتج والله واثقة انتي وراسج

تمينا ساكتين يمكن دقيقة كاملة

ماعرف ليش خنقتني العبرة وبغيت أصيح !!!

قلت له وصوتي متغير حيل من الصيحة علي متى بترجع.؟

علي: عقب يومين .. شفيج قلبي ليش صوتج جذي؟ تصيحين على فراقي؟ شكلج انتي اللي تحبيني

أنا: وعووه ماحبك

علي: جذابة تموتين فيني

أنا: علمووك

طفى التلفون بدون بطارية وانا بعد طفيت من التعب لني كنت صاحية من الساعة 1 الفجر يعني كملت 24 ساعة صاحية

اليوم قمت من النوم مع أذان الظهر لني ماعندي دوام اليوم

حطيت تلفوني على الجارجر وشغلته

لقيت مليون مسكول ههههه

ومسجات وحالة

منه طبعاً

مسكين كان خايف اني فيني شي أو انه حد من اهلي صادني اكلمه او شي لنه يعرف انه اهلي متشددين وايد من هالناحية

لدرجة انه اتصل في أمي وكلمها عشان بس يطمن علي وحليله طبعاً بدون مايجيب سيرتي لنه محد يعرف انه بينا أي علاقة بغض النظر عن نوعها

اللي ماقلته لكم هو كيف تعرفت عليه

قبل شهرين انا وامي كنا مسافرين لدولة عربية وبالصدفة كان هو هناك ويا خواته وازواجهم

على فكرة ترى هو جارنا بس انا ماعرفته الا من هناك ههههه

اليوم بعد الغدا يونا حريم من الأهل وطبعاً من باب الواجب أنا قعدت وياهم مع أمي بس عشان أفك عمري من محاضرة (انتي كبرتي الحين وصرتي في سن يأهلج للعتب والتشره من قبل الناس ...الخ الخ باختصار صيري سنعة)

قعدت وياهم بكل أدب ورزانة الله يحرسني حتى ابوي لمحني من بعيد وماعرفني وانا راكدة

كنت ساكتة طول الجلسة تقريباً أراقب وأتسمع وأسجل ملاحظات في مخي

وكانت ملاحظاتي كالآتي:

1- 98% من سوالف الحريم حش× حش و2% شلونكم شلون العيال

2- قبل ماتبتدي أي وحدة في الكلام عن أي وحدة ثانية تقول فلانة الله يذكرها بالخير سوت وفعلت وقالت والكلام اللي تقوله أبداً ماله بالخير أي صلة <=—طبعاً البعظظظظ وليس الكل، ركزوا على كلمة البعظظظ لني بسألكم فيها سؤال بعد شوي

3- من ضمن التعقيبات لكل قصة وكل حكاية عن فلانة وعلانة تقول أنا مب قصدي أغتابها بس أقول اللي صار يعني

4- تعقيب آخر ومنتشر بشدة: يالله شنسوي بعد هذي الدنيا

5- من السوالف الشائعة: والله صار لي شهرين ماشفت الشارع لو ما مسكينة اختي قالت لي خل نرووح لفلانة قلت يالله منها أغير جو ومنها أشوفج واتطمن عليج.. والله مريضة وصلت للموت بس الله كاتب لي عمر .. ماتسوى علي عزمت فلانة عندي الظاهر عطتني عييين مو مترقعة منها

يعني ها تراني سنعة وشغلي في بيتي وطبخي خرافي وماله مثيل وجمالي منقطع النظير

ياخي من زينج انتي عشان فلانة ولا غيرها تعطيج عين

ياخي ليش تعطين عمرج أهمية ليش تتحرين عمرج مهمة لدرجة ان الناس تنبهر فيج وممكن تحسدج ترى الناس مب فاضية لج والله ليش تعتقدين انه لج أهمية اللي تخلي الناس تحسدج ولا السالفة الأحلى انه اي ثنتين يتساسرون ولما تمرين صوبهم يسكتون يعني يتكلمون عليج منو انتي الملكة رانيا لاسمح الله؟ <=—هدي فديتج وسيطري على مشاعرج

شكثر صار عندي وقت فراغ اليوم لدرجة اني حاولت اذاكر تخيلوا أنا أذاكر !!!

على طاري المذاكرة حد منكم شاطر في الماث انا حدي فاااشلة وماعرف شو اسوي ههههه

شاغل بالي اللي صار البارحة واليوم

أنا مستانسة انه في حد يهتم فيني جذه

بس خايفة انه هالاهتمام معناه شي ثاني

وانا والله مالي خلق هالسوالف وهالخرابيط كل اللي اباه صداقة وبس

تعتقدون انه معاي حق في هالمخاوف ولا انا من كثر ما افكر واحلل في الموضوع قمت اشك واعقد الموضوع وهو عادي وبسيط؟

المهم يالله عاد مصختوها ترى خلوني أروح أتعشى ادري ماشبعتوا مني بس لازم أروح <=—لا حلفي؟

يالله فديتكم بباي :*

يا حبني لكمـ واللهـ .. :*

الحمدللهـ انتهى الأسبوع المشؤومـ وانا متأملة خير في هالأسبوع انشاللهـ

توني رجعت من طلعة حلوة مع الأهل نسيت فيها كل الزعل

طبعاً ماقدرت أطلع الا بعد ما أخذت 4 حبات بندول اكسترا بس عشان الصداع يخف

خل أتكلمـ شوي عن أصدقائي الحاليين

مثل ماقلت قبل عندي معارف وايد بس ماقدر أقول أصدقاء الا عن هالاثنين

غادة وعلي

اثنينهم من نفس العمر تقريباً واثنينهم أكبر عني

من صغري وأنا ماخاوي الا اللي أكبر عني ماعرف ليش ..؟

غادة أعرفها من 5 سنوات تقريباً بس علاقتي فيها صارت أقوى مؤخراً

أحبها وأحترمها وهي تحبني بعد وتموت فيني

بس عيبها انها وايد تغار عليه من كل شي وأي شي

ماتبا حد يكلمني ولا تباني أكلم حد ليش ماعرف ..؟

وكلما أشوفها تغرقني هدايا وكلام حب وشوق يحرجني بالحيل وبالتالي أتم ساكتة وما أتكلم

فتتهمني بالبرود والجفاف العاطفي والقسوة بعض الأحيان

ودايماً وأبداً تشتكي من نظراتي تقول اني أخزها وأخرعها لووول

رغم اني بينت لها أكثر عن مرة اني انا نظراتي طبيعية جذه لكنها مب طايعة تستوعب فديتها

أحبج :*

علي تعرفت عليه من شهرين يمكن يعني مب من زمان

لكني أحس اني أعرفه من سنين والله

هالولد فاهمني زيين وعارف لي

بينا طلعات حلوة بالأحرى شردات لو يدرون عني أهلي نسفوني نسفاً مبرحاً <=—كيف تيي مادري بس كيفي

ويمكن نتكلم في اليوم 16 ساعة من 24 ساعة قولوا ماشاللهـ كككـ

أحب أسولف وياه وأحب أطلع وياه وايد متحمل غلاستي وشطانتي ومشاغباتي لا ويكافئني عليها بعض الأحيان خخخ

أذكر أول مرة طلعنا مع بعض سرت الجامعة من وقت وشردت وياه من هناك

سرنا البحر كانت الساعة تقريباً 8 ونص الصبح

والجو لندني رهييييب أنا من زود الوناسة طيحت الثقل والرزانة من أول ربع ساعة ويلست أراكض وراسي وألف سيف إلا اطب أسبح في البحر

وهو يقولي انزين بس خليها المرة الياية ييبي لج ثياب <=—شكله كان يقول شو هالورطة اللي حطيت عمري فيها

اليوم كان من المفترض انه يسافر عشان شغله بس تأجلت السفرة رغم اني شاكة انه له يد بالموضوع لنه ماكان يبا يسافر وكاره موضوع السفرة كله

يقول اونه تعودت عليج واذا سافرت مابقدر أكلمج وبكتئب

وأنا بكل بجاحة وقلة أدب أقوله انزين روح سافر عشان ارتاح منك يومين ثلاثة وأكمل أشغالي اللي معطلتها على حسابك لني أربعة ساعة وعشرين أرضع عالتلفون وياكـ <=—حسيته وده يتفل بويهي بس مستحي

عالعموم انا مخططة على شردة حلوة يوم الإثنين انشاللهـ

ماي بي اف اف أحبكـ دبوه ..

أحس اني سولفت سوالف سنة في 10 دقايق

خل أروح أشوف شو صار في الكلاسيكو <=—مسوية راعية كورة

عن ازنكو يا قماعة

:*

قبل ما أنسى

أحب أشكر اللي علقوا على بوستي السابق وحاولوا يرفعون معنوياتي عاد من صدق ارتفعت معنوياتي

لف يو :**

Bad week..!

مرحبا

هذا الأسبوع كان من أسوأ الأسابيع اللي مرت عليه في حياتي

كل يوم هواش ومشاكل داخل البيت وبره البيت

اهلي

اللي احبهم

وفوق هذا قاعدة أحس بوحدة قاتلة بصراحة

حالياً أنا أعيش مرحلة صعبة جداً حيث انه مصيري في ايد شخص ثاني

وطالما هالشخص مصر انه يستنذل ويمارس جميع ألاعيبه وحركاته الدنيئة ويايه شي طبيعي نفسيتي بتنحدر للأسوأ ثم الأسوأ

عند البعض ربما هالشي مايكون مبرر كافي لتصرفاتي الغريبة

في لحظة تتملكني رغبة في العزلة والانطواء على الذات ويأس وإحباط وأهرب من حياتي بالنوم وتنقضي أيام بدون ماحس بمرور الوقت

وفجأة أكون أكثر إنسانة اجتماعية ممكن تقابلها في حياتك أبا أطلع وأهيت واشوف الناس وأعيش حياتي وكأن شيئاً لم يكن وعيوني وملامحي وحركاتي كلها تنقط أمل وتفاؤل

ومرات اجابل التلفزيون أو البي بي أو اللاب توب وانفصل انفصال تام عن الواقع يعني مادري منو فالبيت منو يتكلم شو صاير شو ماصاير أبد

أي شي يصير خارج حدود الفريم مال التلفزيون أو اللاب توب أو البي بي مالي علاقة فيه ولا يهمني بعد

طبعاً أهلي متعبنهم حالي المتقلب

وأنا مالومهم على هالشي

بس بعض الأحيان لما يزودونها حبتين في الحنة والقرقة ألومهم وبقوة بعد

ألومهم حتى على وضعي اللي انا فيه الحينه وبيني وبينكم جزء كبير من الملامة يقع عليهم وهم حاسين بهالشي

قبل شوي تهاوشت ويا ابويه وقلت له اصلا محد خرب حياتي الا انتوا لو خليتوني على كيفي ماكنت وصلت لهالحال

على قد ماكنت معصبة وأعصابي تلفانة على قد ما ألمتني هالكلمة لني حسيتها ألمت ابويه وبقوة وانا ماقوى زعله بس شسوي طبعي خايس

لما حد يجرحني انقي الكلام اللي يسم البدن واقطه عليه عشان اسقيه من نفس الكاس اللي سقاني منه

ببساطة ابويه قالي انتي قلبج أسود ..!

حزتها مااهتميت لكلامه

بس الحينه أفكر هل أنا فعلا قلبي أسود مثل مايقول

أنا عمري مالمتهم على هالموضوع وحتى لما يلومون نفسهم جدامي ويعتذرون مني انا اقول لهم لا انتوا مالكم علاقة باللي استوى هذا أمر الله وماعرف شو

أنا لما قلت له انتوا السبب هل فعلاً كان قصدي اني اقهره مثل ماقهرني ولا انا فعلاً حاسة بهالشي من داخل وطلع الكلام في لحظة غضب؟

عالعموم الحينه راسي يعورني صارلي أسبوع ملازمني صداع مب طبيعي

بحاول اخذ لي غفوة رغم اني متأكدة اني مابقدر بس بحاول

جاو جاو